ಆಂಧ್ರ ವಿಧಾನಸಭೆಯಲ್ಲಿ ನಟ ಹಾಗೂ ಶಾಸಕ ನಂದಮೂರಿ ಬಾಲಕೃಷ್ಣ ಮೆಗಾಸ್ಟಾರ್ ಚಿರಂಜೀವಿ ಬಗ್ಗೆ ವ್ಯಂಗ್ಯಭರಿತವಾಗಿ ಮಾತನಾಡಿದ ಘಟನೆ ಇದೀಗ ಚಿತ್ರರಂಗದಲ್ಲಿ ಚರ್ಚೆಯಾಗುತ್ತಿದೆ. ಆದರೆ ಬಾಲಕೃಷ್ಣ ಹೇಳಿಕೆಗಳಿಗೆ ಚಿರಂಜೀವಿ ಅತ್ಯಂತ ಘನತೆ ಮತ್ತು ವಿನಯದಿಂದ ಪ್ರತಿಕ್ರಿಯಿಸಿದ್ದು, ಮೆಗಾಸ್ಟಾರ್ ಅವರ ಸಮತೋಲನದ ನಿಲುವು ಮತ್ತೊಮ್ಮೆ ಮೆಚ್ಚುಗೆಗೆ ಪಾತ್ರವಾಗಿದೆ.
ಹಿಂದಿನಿಂದಲೇ ಚಿರಂಜೀವಿ ಮತ್ತು ನಂದಮೂರಿ ಕುಟುಂಬಗಳ ನಡುವೆ ವೈಷಮ್ಯವಿದ್ದು, ಬಾಕ್ಸ್ ಆಫೀಸ್ನಲ್ಲಿ ಹಲವು ಬಾರಿ ನೇರಾ-ನೇರಾ ಪೈಪೋಟಿ ಕಂಡಿದೆ. ಇತ್ತೀಚಿನ ವರ್ಷಗಳಲ್ಲಿ ಈ ಬಿಕ್ಕಟ್ಟು ಕಡಿಮೆಯಾಗಿ, ಚಿರಂಜೀವಿ ಬಾಲಯ್ಯ ಕಾರ್ಯಕ್ರಮಕ್ಕೂ ಹಾಜರಾಗಿ ಸ್ನೇಹಪೂರ್ವಕವಾಗಿ ವರ್ತಿಸಿದ್ದರು. ಆದರೆ ಬಾಲಕೃಷ್ಣ ಅವರ ತಾಜಾ ಹೇಳಿಕೆ ಮತ್ತೆ ಇಬ್ಬರ ನಡುವಿನ ಬಿರುಕುಗಳನ್ನು ತೋರಿಸಿದೆ.
ಬಾಲಕೃಷ್ಣ ವಿಧಾನಸಭೆಯಲ್ಲಿ ಮಾತನಾಡುತ್ತಾ, “ಚಿರಂಜೀವಿ ಗಟ್ಟಿಯಾಗಿ ಮಾತನಾಡಿದ ಕಾರಣ ಸಿಎಂ ವೈಎಸ್ ಜಗನ್ ಚಿತ್ರರಂಗದವರನ್ನು ಭೇಟಿಯಾದರು ಎಂಬುದು ಸುಳ್ಳು. ಅವರು ಧೈರ್ಯವಾಗಿ ಮಾತನಾಡಿಲ್ಲ” ಎಂದು ಪರೋಕ್ಷವಾಗಿ ಟೀಕಿಸಿದ್ದರು.
ಈ ಹೇಳಿಕೆಗಳಿಗೆ ಪ್ರತಿಕ್ರಿಯಿಸಿದ ಚಿರಂಜೀವಿ, “ಆ ಸಮಯದಲ್ಲಿ ನಿರ್ಮಾಪಕರು, ವಿತರಕರು ನನ್ನನ್ನು ಸಂಪರ್ಕಿಸಿದ್ದರು. ಅವರ ಮನವಿಯ ಮೇರೆಗೆ, ಆಗಿನ ಸಿನಿಮಾಟೊಗ್ರಫಿ ಮಂತ್ರಿ ಪೆರಿನಿ ನಾನಿ ಸಹಾಯದಿಂದ ಸಿಎಂ ಅವರನ್ನು ಭೇಟಿಯಾದೆ. ಉಪಹಾರ ವೇಳೆ ಅವರೊಂದಿಗೆ ಮಾತನಾಡಿ ಚಿತ್ರರಂಗದ ಸಂಕಷ್ಟ ವಿವರಿಸಿದೆ. ಬಳಿಕ ಕೋವಿಡ್ ನಿರ್ಬಂಧಗಳಿಂದಾಗಿ ಅಲ್ಪ ಸಂಖ್ಯೆಯ ಗಣ್ಯರನ್ನು ಮಾತ್ರ ಸಭೆಗೆ ಕರೆದುಕೊಂಡು ಹೋದೆ” ಎಂದು ವಿವರಿಸಿದರು.
ಅದೇ ಸಂದರ್ಭವನ್ನು ನೆನಪಿಸಿಕೊಂಡ ಚಿರಂಜೀವಿ, “ಸಭೆಯಲ್ಲಿ ಸಿಎಂ ಜಗನ್ ಅತ್ಯಂತ ಗೌರವದಿಂದ ನಡೆದುಕೊಂಡರು. ನಾವು ಟಿಕೆಟ್ ದರ ಹೆಚ್ಚಿಸುವಂತೆ ಮನವಿ ಮಾಡಿದೆವು. ಅದರಿಂದ ಮುಂದಿನ ಅನೇಕ ಚಿತ್ರಗಳಿಗೆ, ‘ವಾಲ್ಟರ್ ವೀರಯ್ಯ’, ‘ವೀರ ನರಸಿಂಹ ರೆಡ್ಡಿ’ ಸೇರಿದಂತೆ, ಸಹಾಯ ಆಯಿತು” ಎಂದರು.
ತಮ್ಮ ಶಾಂತ ಸ್ವಭಾವವನ್ನು ಉಲ್ಲೇಖಿಸಿದ ಮೆಗಾಸ್ಟಾರ್, “ವಿನಯ ನನ್ನ ನೈಸರ್ಗಿಕ ಗುಣ. ನಾನು ಯಾರನ್ನೂ ಆಕ್ರೋಶದಿಂದ ಸಂಪರ್ಕಿಸುವುದಿಲ್ಲ. ಅದು ಸಿಎಂ ಆಗಿರಲಿ ಅಥವಾ ಸಾಮಾನ್ಯ ವ್ಯಕ್ತಿಯಾಗಿರಲಿ, ಗೌರವಪೂರ್ವಕವಾಗಿ ಮಾತನಾಡುತ್ತೇನೆ” ಎಂದು ಸ್ಪಷ್ಟಪಡಿಸಿದರು.
ಅಂದರೆ, ಬಾಲಯ್ಯ ಮಾಡಿದ ಟೀಕೆಗೆ ಚಿರಂಜೀವಿ ತಮಗೆ ಸಾದಾರಣವಾದ ಶಾಂತ, ವಿನಯಮಯ ಶೈಲಿಯಲ್ಲೇ ಪ್ರತಿಕ್ರಿಯಿಸಿ, ತಮ್ಮ ಮೆಗಾಸ್ಟಾರ್ ಇಮೇಜ್ಗೆ ತಕ್ಕ ಉತ್ತರ ನೀಡಿದ್ದಾರೆ.
