74ರ ವಯಸ್ಸಿನಲ್ಲಿ ಪೋಷಕ ಪಾತ್ರಗಳನ್ನು ಮಾಡುವುದೇ ಕಷ್ಟ ಎನ್ನಬಹುದು. ಆದರೆ, ನಟ ರಜನಿಕಾಂತ್ ಅವರು ಹೀರೋ ಆಗಿಯೇ ಇನ್ನೂ ಮುಂದುವರಿದಿದ್ದಾರೆ. ಅಷ್ಟೇ ಅಲ್ಲ, ನಟ ರಜನಿಕಾಂತ್ ಅವರು ಕಳೆದ 10 ವರ್ಷಗಳಿಗಿಂತ ಹೆಚ್ಚು ಸಮಯದಿಂದ ತಮಗಿಂತ ತುಂಬಾ ಯಂಗ್ ಡೈರೆಕ್ಟರ್‌ಗಳ ಸಿನಿಮಾಗಳಲ್ಲಿಯೇ ನಟಿಸುತ್ತಿದ್ದಾರೆ. ತಮ್ಮ ಫಿಟ್ನೆಸ್‌ ಸೀಕ್ರೆಟ್‌ ಬಗ್ಗೆ ರಜನಿಕಾಂತ್ ಮಾತನಾಡಿದ್ದಾರೆ.
ನನಗೆ ನಾನು ಕೇವಲ ದೇಹದಲ್ಲಿ ಇಲ್ಲ ಎಂದು ಸಾಕಷ್ಟು ವರ್ಷಗಳ ಹಿಂದೆಯೇ ಅರ್ಥವಾಗತೊಡಗಿತು. ಅದನ್ನು ಅನುಭವ ಅಂತ ಕೂಡ ಹೇಳಬಹುದು. ನಾನು ನಿಧಾನವಾಗಿ ಯೋಗ, ಪ್ರಾಣಾಯಾಮ, ಆಧ್ಯಾತ್ಮ ಹೀಗೆ ದೇಹವನ್ನು ಮೀರಿದ ಆಯಾಮಗಳ ಬಗ್ಗೆ ತಿಳಿದುಕೊಳ್ಳುತ್ತಾ ಸಾಗಿದೆ. ಅದೆಷ್ಟೋ ವರ್ಷಗಳಿಂದ ನಾನು ಹಿಮಾಲಯಕ್ಕೆ ಹೋಗಿ ನನ್ನ ಗುರುಗಳ ಜೊತೆ ಕುಳಿತು ಆಧ್ಯಾತ್ಮದ ಸಾಧನೆಯಲ್ಲಿ ತೊಡಗಿಸಿಕೊಂಡೆ. ನಾನು ಮಾಡುತ್ತಿದ್ದ ಯೋಗ ಸಡನ್ನಾಗಿ ಫಲ ನೀಡಲಿಲ್ಲ. ಆದರೆ ನಿಧಾನವಾಗಿ ನಾನು ಅಭ್ಯಾಸವನ್ನು ಹೆಚ್ಚಿಸಿಕೊಂಡು ಅದರಲ್ಲಿ ಸಂಪೂರ್ಣವಾಗಿ ಮಗ್ನನಾದೆ. ನಾನು ಮಾಡುವ ಯೋಗದ ಪ್ರಕಾರವನ್ನು ಕ್ರಿಯಾಯೋಗ ಅಂತಾರೆ. ಅದನ್ನು ದೀಕ್ಷೆ ತೆಗೆದುಕೊಂಡು ಗುರುಗಳ ಮುಖೇನ ಮಾಡಬೇಕಾಗುತ್ತದೆ. ಪ್ರತಿದಿನ ಅಭ್ಯಾಸ ಮಾಡುವುದರಿಂದ ಅದು ನನಗೀಗ ಸಂಪೂರ್ಣ ಅಭ್ಯಾಸವಾಗಿ ಮಾರ್ಪಟ್ಟಿದೆ.
ನಿಜ ಹೇಳಬೇಕು ಎಂದರೆ ನಾನು 2002 ರಲ್ಲಿಯೇ ಕ್ರಿಯಾ ಯೋಗವನ್ನು ಪ್ರಾರಂಭಿಸಿದೆ. ಆದರೆ, ಅದರ ಪ್ರಯೋಜನಗಳನ್ನು ಸಂಪೂರ್ಣವಾಗಿ ಅನುಭವಿಸಲು ಹತ್ತು ವರ್ಷಗಳು ಬೇಕಾಯಿತು.. ಯೋಗ ಹಾಗೂ ಪ್ರಾಣಾಯಾಮಗಳ ಪರಿಣಾಮ ಅನುಭವಿಸಲು ಕಾಯಬೇಕಾಗುತ್ತದೆ. ಅದಕ್ಕೆ ನಿರಂತರ ಅಭ್ಯಾಸದ ಅಗತ್ಯವೂ ಇದೆ. ಯೋಗಾಭ್ಯಾಸವನ್ನು ಪ್ರತಿದಿನ ಅಭ್ಯಾಸ ಮಾಡುವುದರಿಂದ ನಿಮ್ಮ ಶಕ್ತಿಯ ಮಟ್ಟ ಸ್ಥಿರವಾಗಿರುತ್ತವೆ. ಕಳೆದ 21 ವರ್ಷಗಳಿಂದ ನಾನು ನಿರಂತರವಾಗಿ ಕ್ರಿಯಾ ಯೋಗವನ್ನು ಅಭ್ಯಾಸ ಮಾಡುತ್ತಿದ್ದೇನೆ ಎಂದಿದ್ದಾರೆ.
