ಬಿಗ್ಬಾಸ್ ಕನ್ನಡ ಸೀಸನ್ 12 ದಿನದಿಂದ ದಿನಕ್ಕೆ ಹೊಸ ವಿವಾದಗಳಿಂದ ಕಂಗೊಳಿಸುತ್ತಿದೆ. ಇತ್ತೀಚಿನ ವಿವಾದದ ಕೇಂದ್ರಬಿಂದುವಾಗಿ ನಿಂತಿರುವವರು ಸ್ಪರ್ಧಿ ಅಶ್ವಿನಿ ಗೌಡ. ಕಳೆದ ವಾರದ ಎಪಿಸೋಡ್ನಲ್ಲಿ ಅಶ್ವಿನಿ ಗೌಡ ಹಾಗೂ ರಕ್ಷಿತಾ ಶೆಟ್ಟಿ ನಡುವೆ ನಡೆದ ಬಿಕ್ಕಟ್ಟಿನ ಮಾತುಕತೆ ಇದೀಗ ಕಾನೂನು ಹಾದಿ ಹಿಡಿದಿದೆ.
ಆ ವೇಳೆ ಅಶ್ವಿನಿ ಗೌಡ, ರಕ್ಷಿತಾರ ಉಡುಗೆ, ನಡೆಯು, ವ್ಯಕ್ತಿತ್ವ ಇತ್ಯಾದಿ ಕುರಿತು ತೀವ್ರ ಟೀಕಾತ್ಮಕವಾಗಿ ಮಾತನಾಡಿದ್ದು, “She is a S” ಎಂಬ ಪದವನ್ನು ಬಳಕೆ ಮಾಡಿದ್ದರು. ಈ ಮಾತು ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಚರ್ಚೆಗೆ ಕಾರಣವಾಯಿತು. ನಂತರ ವೀಕೆಂಡ್ ಎಪಿಸೋಡ್ನಲ್ಲಿ ಕಿಚ್ಚ ಸುದೀಪ್ ಅಶ್ವಿನಿಯ ಈ ಹೇಳಿಕೆಯನ್ನು ಕಠಿಣವಾಗಿ ಖಂಡಿಸಿದ್ದರು. ಆಗಲೇ ಅಶ್ವಿನಿ ಗೌಡ, ರಕ್ಷಿತಾ ಬಳಿ ಕ್ಷಮೆ ಕೇಳಿ ವಿಷಯವನ್ನು ಶಮನಗೊಳಿಸಿದ್ದರು.
ಆದರೆ ವಿಷಯ ಅಲ್ಲಿಯೇ ನಿಂತಿಲ್ಲ. ಇದೀಗ ಈ ಘಟನೆಯ ಕುರಿತು ಹೈಕೋರ್ಟ್ ವಕೀಲ ಪ್ರಶಾಂತ್ ಮೆಹ್ತಾಲ್ ಅವರು ಬಿಡದಿ ಪೊಲೀಸ್ ಠಾಣೆಯಲ್ಲಿ ಅಶ್ವಿನಿ ಗೌಡ ವಿರುದ್ಧ ಅಧಿಕೃತ ದೂರು ದಾಖಲಿಸಿದ್ದಾರೆ. ದೂರುದಲ್ಲಿ ಬಿಗ್ಬಾಸ್ ಕಾರ್ಯಕ್ರಮದ ಸಿನೆಸ್ ಹೆಡ್ ಪ್ರಶಾಂತ್ ನಾಯ್ಕ್, ಸುಷ್ಮಾ, ಪ್ರಕಾಶ್ ಸೇರಿದಂತೆ ನಾಲ್ವರ ಹೆಸರುಗಳೂ ಸೇರಿವೆ.
ಅಶ್ವಿನಿಯ ಪದ ಬಳಕೆಯನ್ನು ಹಲವರು ಅವಾಚ್ಯ ಎಂದು ಪರಿಗಣಿಸಿದ್ದು, ಸಾಮಾಜಿಕ ಮಾಧ್ಯಮದಲ್ಲಿ ವಿವಿಧ ಅರ್ಥಗಳು ಹರಿದಾಡುತ್ತಿವೆ. “ಎಸ್” ಎಂದರೇನು ಎಂಬುದರ ಕುರಿತು ಅಶ್ವಿನಿಯ ಉದ್ದೇಶ ಸ್ಪಷ್ಟವಾಗದಿದ್ದರೂ, ಆ ಪದವು ಮಹಿಳೆಯ ಗೌರವಕ್ಕೆ ಧಕ್ಕೆ ತರುವಂತದ್ದಾಗಿದೆ ಎಂಬ ಅಭಿಪ್ರಾಯ ವ್ಯಕ್ತವಾಗಿದೆ.
ಮನೆಯಲ್ಲಿ ರಕ್ಷಿತಾ ಕುರಿತಂತೆ ನಡೆದ ಘಟನೆಯ ನಂತರ ಅಶ್ವಿನಿಯ ನಡೆಗೆ ಇತರ ಸ್ಪರ್ಧಿಗಳೂ ಅಸಮಾಧಾನಗೊಂಡಿದ್ದರು. ವಯಸ್ಸಿನಲ್ಲಿ ಕಿರಿಯಳಾದ ರಕ್ಷಿತಾ ಮೇಲೆ ನಡೆದ ಈ ತೀವ್ರ ವಾಗ್ವಾದವು ವೀಕ್ಷಕರನ್ನೂ ಕಳವಳಗೊಳಿಸಿತ್ತು.
ನಟಿಯಾಗಿರುವ ಜೊತೆಗೆ ಕರವೇ ಸಂಘಟನೆಯ ಸಕ್ರಿಯ ಸದಸ್ಯೆಯೂ ಆಗಿರುವ ಅಶ್ವಿನಿ ಗೌಡ, ತಮ್ಮ ಮೇಲಿರುವ ಹಲವು ಪ್ರಕರಣಗಳ ಪೈಕಿ ಈಗ ಹೊಸ ಪ್ರಕರಣವನ್ನೂ ಸೇರಿಸಿಕೊಂಡಿದ್ದಾರೆ.
ಈ ವಿವಾದ ಬಿಗ್ಬಾಸ್ ಮನೆಯಲ್ಲಿ ಮತ್ತೊಮ್ಮೆ ತೀವ್ರ ಚರ್ಚೆಗೆ ಕಾರಣವಾಗಿದ್ದು, ಮುಂದಿನ ಎಪಿಸೋಡ್ನಲ್ಲಿ ಸುದೀಪ್ ಇದರ ಬಗ್ಗೆ ಏನು ಹೇಳುತ್ತಾರೆ ಎಂಬುದರತ್ತ ಪ್ರೇಕ್ಷಕರ ಕಣ್ಣಿದೆ.
