ಹೇಮಂತ್ ಎಂ. ರಾವ್ ಅವರ ನಿರ್ದೇಶನದಲ್ಲಿ ಮೂಡಿ ಬರುತ್ತಿರುವ ‘666 ಆಪರೇಷನ್ ಡ್ರೀಮ್ ಥಿಯೇಟರ್’ ಸಿನಿಮಾ ಪ್ರೇಕ್ಷಕರನ್ನು 1970ರ ದಶಕದ ಕನ್ನಡ ಚಿತ್ರರಂಗದ ಬಾಂಡ್ ಯುಗಕ್ಕೆ ಕರೆದುಕೊಂಡು ಹೋಗುತ್ತಿದೆ. ಆ ಕಾಲದ ವಸ್ತ್ರ ವಿನ್ಯಾಸ, ಬೆಳಕು, ಸೆಟ್ ವಿನ್ಯಾಸಗಳ ಜೊತೆಗೆ, ಡಾ. ರಾಜ್ಕುಮಾರ್ ಅವರ ಕಾಲದ ‘ವಿಂಟೇಜ್ ಲೊಮೋಸ್’ ಕ್ಯಾಮೆರಾ ಲೆನ್ಸ್ಗಳನ್ನು ಬಳಸಿಕೊಂಡು ಚಿತ್ರವನ್ನು ಚಿತ್ರೀಕರಿಸಲಾಗುತ್ತಿದೆ.
ಚಿತ್ರದ ಛಾಯಾಗ್ರಾಹಕ ಅದ್ವೈತ್ ಗುರುಮೂರ್ತಿ ಹೇಳುವಂತೆ — “ಪ್ರತಿ ಶಾಟ್, ಬೆಳಕು ಮತ್ತು ಸೆಟ್ಗಳು ಅಣ್ಣಾವ್ರ ‘ಆಪರೇಷನ್ ಡೈಮಂಡ್ ರಾಕೆಟ್’, ‘ಜೇಡರ ಬಲೆ’ ಚಿತ್ರಗಳ ಶೈಲಿಯಲ್ಲಿರಬೇಕು ಅನ್ನೋದು ನಮ್ಮ ಉದ್ದೇಶ. ಅದಕ್ಕಾಗಿ ನಾವು ಪೋಸ್ಟ್ ಪ್ರೊಡಕ್ಷನ್ಗೆ ಮಾತ್ರ ಅವಲಂಬಿಸದೆ, ಶೂಟಿಂಗ್ ವೇಳೆ ನೇರವಾಗಿ ಆ ಯುಗದ ಶೈಲಿಯ ಟಂಗ್ಸ್ಟನ್ ಲೈಟ್ಸ್ ಮತ್ತು ವಿಂಟೇಜ್ ಲೆನ್ಸ್ಗಳನ್ನು ಬಳಸಿದ್ದೇವೆ.”
ತಂಡವು 16 ವಿಭಿನ್ನ ಲೆನ್ಸ್ ಸೆಟ್ಗಳನ್ನು ಪರೀಕ್ಷಿಸಿ, ಕೊನೆಯಲ್ಲಿ ವಿಂಟೇಜ್ ಲೊಮೋ ಅನಾಮಾರ್ಫಿಕ್ ಮತ್ತು ಲೊಮೋ ಸ್ಫೆರಿಕಲ್ ಲೆನ್ಸ್ಗಳನ್ನು ಆಯ್ಕೆಮಾಡಿದೆ. ಈ ಲೆನ್ಸ್ಗಳು ತಮ್ಮ ಆರ್ಗ್ಯಾನಿಕ್ ಫ್ಲೇರ್ಗಳು, ಪೇಂಟರ್ಲಿ ಫಾಲ್-ಆಫ್ ಮತ್ತು ಇಂಪರ್ಫೆಕ್ಟ್ ಬ್ಯೂಟಿಗಾಗಿ ಪ್ರಸಿದ್ಧ.
ಧನಂಜಯ್ ಮುಖ್ಯಪಾತ್ರದಲ್ಲಿ ಅಭಿನಯಿಸುತ್ತಿರುವ ಈ ಚಿತ್ರವನ್ನು ಡಾ. ವೈಶಾಖ್ ಜೆ ಗೌಡ ಅವರ ವೈಶಾಖ್ ಜೆ ಫಿಲ್ಮ್ಸ್ ನಿರ್ಮಿಸುತ್ತಿದೆ. ಚರಣ್ ರಾಜ್ ಸಂಗೀತ ನಿರ್ದೇಶಕರಾಗಿದ್ದು, ವಿಶ್ವಾಸ್ ಕಶ್ಯಪ್ ಪ್ರೊಡಕ್ಷನ್ ಡಿಸೈನರ್ ಆಗಿ ಕಾರ್ಯನಿರ್ವಹಿಸುತ್ತಿದ್ದಾರೆ. ವಿಶೇಷವೆಂದರೆ, ಡಾ. ಶಿವರಾಜ್ಕುಮಾರ್ ಈ ಚಿತ್ರದಲ್ಲಿ ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ.
ಭಾರೀ ಬಜೆಟ್ನೊಂದಿಗೆ ನಿರ್ಮಾಣವಾಗುತ್ತಿರುವ ‘666 ಆಪರೇಷನ್ ಡ್ರೀಮ್ ಥಿಯೇಟರ್’, ಕನ್ನಡ ಮತ್ತು ತೆಲುಗು ಭಾಷೆಗಳಲ್ಲಿ ಏಕಕಾಲದಲ್ಲಿ ಬಿಡುಗಡೆಯಾಗಲಿದ್ದು, ಪ್ರೇಕ್ಷಕರಿಗೆ ವಿಂಟೇಜ್ ಶೈಲಿಯ ವಿಶಿಷ್ಟ ದೃಶ್ಯಾನುಭವ ನೀಡಲಿದೆ.
